عزیز فیاض
یاد مو بشه که نربوز بلدے مو شیر نمیدیه
تا غئیدی شیر نباشه دوغ اید پنیر نمیدیه
سیالائی قوم الئ گو در مو که زورشی بیرسه
آغیل و جائ ره بیلو پوستگی سیر نمیدیه
دونیا کلو دو رنگه زغچئ ره توغ کنی مو
ده توری اید شکاری خود خو ده گیر نمیدیه
آیینی سخت ره آو نه آتیشی داغ و اودو
قوغ آر مجل که گول شد دیگه او ایر نمیدیه
تا که غریب چپاگ شی موشت نشوده ده دورو
آقی غریب ره اید غید ارباب و میر نمیدیه
قرقه که روش بشه خوب تیر آر مجل که بور شد
دونیا که سنگ بگرده رائ خو تغیر نمیدیه
10/4/2010
